Amasya eşrâfından Hâtuniyye vakfı mütevellîsi Hasan Ağa’nın mahdûmudur. Gençliğinde Hattât Hâfız Ahmed Efendi’den hutût-ı mütenevviayı tahsîl ve temeşşuk edib İstanbul’a gitdi. Divân-ı Hümâyûn kalemine girip tefeyyüz ederek Fâzıl Ahmed Paşa’nın evâhir-i sadâretinde tezkîre-i sânî oldu. [420]
1087 şâbânında Sadr-ı a’zam olan Kara Mustafa Paşa’nın zamanında birinci tezkîreci ve 1095’de müşârün-ileyhin i’dâmında ma’zûl ve menkûb olup Hicâz’a gitdi. Burada bir müddet kalıp Amasya’ya avdet edebildi.
1102’de ilk meclis-i a’yânın açılmasında baş a’yân olup birkaç yıl riyâsetde kaldı. Ba’dehû pederi gibi Hâtuniyye vakfı mütevellîsi, 1112’de baş a’yân görüldü. 1121 cumâdelûlâsında vefât etdi. Hâcegân-ı Divân-ı Hümâyûn’dan edîb, nâfizü’l kelim bir zât idi. Mahdûmları Mustafa, Halil, Mehmed Ağalardır. Bunlara ve bunların evlâdına “Hacı Bâkîzâdeler” denirdi. Hâfız Mustafa Ağa 1142 zilka’desinde fevt oldu. Mahdûmu ricâlden Abdî Ağa’dır.