Amasyalıdır. Dervişân-ı Halvetiyyeden ve Şeyh Osmân Efendi evlâdından Hüseyin Dede’nin mahdûmudur. Hâtunîye câmii vâizi ve Mahmûd Çelebi Tekkesi şeyhi es-Şeyh Hızır Efendi’nin halka-i zikr ü ifâdesinde tahsîl-i ilm ve tekmîl-i sülûk ederek şeyh-i müşârün-ileyhden hilâfet aldı.
İbtidâ Kağnılı Ali Ağa Tekkesi şeyhi ve İbadullah Câmii vâizi olup ilm ü takvasıyla iştihâr etdi. Ba’dehû Osmân Efendi Tekkesi şeyhi ve Saz Malikânesi ve Sultân Bâyezîd dersiyyesi mutasarrıfı olup yıllarca orada zikr ve ibâdetle iştigâl ve 1114 hudûdunda dâr-ı naîme irtihâl etdi. Âlim, zâhid, vâiz, nefesi müessir ve şâir idi. Bazen ilâhiyât söylerdi. Mahdûmu Ahmed Efendi’dir.