Esbak Amasya mutasarrıfı Mikdâd Ahmed Paşa bin Canikli el-Hâc Alî Paşa bin Ahmed Ağa’nın mahdûmudur. 1190’da Amasya’da doğdu. 1202’de pederi Amasya’dan kaldırıldığı esnâda beraber gidip 1206’da i’dâm edildikte amcası Battâl Hüseyin Paşa’nın yanına geldi.
1214 senesi gurre-i zilhiccesinde ammizâdesi Tayyâr Mahmûd Paşa tarafından Amasya mütesellimi olup geldi. Şîrînzâde Hâfız el-Hâc Hasan Ağa’yı kendisine kethüdâ nasb ederek [493] zevk ü safâya daldı. Kendisine tarafdâr olanları olanca kuvvetiyle himâye ve mu’ârızları ifnâda ifrât etdi.
1218’de Gürcüzâde Osmân Paşa’yı i’dâma me’mûr olan Tayyâr Paşa ile beraber îfâ-yı celâdet eylediğinden dergâh-ı âlî kapıcıbaşılığı rütbesiyle taltîf edildikte tuğyânı arttı. Halkın a’râz u emvâline tasallut eylediğinden şikâyetler dîvân-ı âlî ve sem’-i hümâyûna kadar yükseldi.
1219 senesi gurre-i muharreminden i’tibâren Amasya sancâğı Cebbârzâde Süleyman Bey’e ilzâm u tevcîh edildiğinden târîh kısmında tafsîl edildiği üzere Amasya’dan kuvvetleriyle beraber çıkıp Havza kazâsına kadar tebâ’üd etdi. Mu’ahharan Bafra’da bulunan Tayyâr Mahmûd Paşa’nın gönderdiği asker ve ümerâyla dönüp Amasya’ya cebren girdi.
Bunun üzerine Tayyâr Mahmûd Paşa’nın vaz’iyyet-i âsiyânesi ve bunun harekât-ı zâlimânesi nazar-ı dikkati celb eylediğinden Cebbârzâde Süleyman Bey’e verilen fermân-ı âlî mûcebince Amasya mîr-i müşârün-ileyh tarafından gönderilen kuvvetlerle muhâsara edilip harben istirdâd ve sâhib-i terceme 1220 senesi muharreminde bâ-fermân-ı [494] âlî salben i’dâm edildi.
Zâlim, sefîh, tab’an denî bir mahlûk olduğu hâlde gâyet muta’azzım, nehhâb ü vehhâb, merhameti kıt bir adamdı. Dîndâr, ulemâyı sever, hayr-hâh şeklinde görünür, vicdânsız ahvâl ü mezâlim irtikâb eylerdi. Kendisine müte’allik olanlardan ba’zıları i’dâm ve ba’zıları da nefy ü iclâ edildi.