Dergâh-ı âlî kapıcıbaşılarından olup Amasya’da mektebi olan Müjdeci el-Hâc Mustafa Ağa’nın oğludur. Pederinin vakfına mütevellî ve mukâtaât mültezimi olup cesâret ve faâliyetiyle temâyüz eylediğinden Canikli Hacı Ali Paşa bunu kendi dâiresine aldı. Silâhdârı yapdı.
1191 gurre-i muharreminde paşanın oğlu Mikdâd Ahmed Paşa vezâretle Amasya mutasarrıfı oldukda bunu Mikdâd Paşa’ya kethüdâ nasbederek Amasya’ya gönderdi. Mikdâd Paşa tarafından Amasya mütesellimi olup paşasıyla beraber geldi.
1192 gurre-i muharreminde Mikdâd Paşa’nın kethüdâlığında kalıp mütesellimlikden çekildi. 1193’de Hacı Ali Paşa Cebbârzâde Mustafa Bey harbinde Hacı Ali Paşa mağlûben bütün âilesi efrâdıyla Rusya’ya firâr eylediğinden açıkda kalıp sene-i mezbûrenin zilka’desinde Karahisâr-ı Şarkî’ye nefy edildi.
1195 senesi evâilinde afv u ıtlâk edilerek Gözdaşoğullarıyla Amasya’ya geldi. Şa’banın [551] gurresinde ikinci defa Amasya mutasarrıfı olan Mikdâd Ahmed Paşa’nın kethüdâsı ve zilhiccesi gurresinde sânîyen Amasya mütesellimi oldu.
1196 senesi gâyesinde mütesellimlik uhdesinden alınıp kethüdâlıkda kaldı. 1201 senesi gurre-i muharreminde üçüncü defa Amasya mütesellimi ve gâyesinde ma’zûl ve kethüdâlıkda ber-devam olup 1203 senesi şevvâlinin gurresinde müthîş şikâyetler üzerine Mikdâd Paşa azledildi.
Muahharan Mikdâd Ahmed Paşa Diyarbekir vâlisi oldukda yine kethüdâsı olarak beraber gitdi. Fakat Diyarbekir halkı da şikâyetler etdiğinden azl ve vezâreti ref’ edilerek Paşa Filibe’ye i’zâm edildikde bu Amasya’ya geldi.
1206 senesi zilhiccesinin evâilinde Amasya’da yapılan tahkîkât evrâkı Divân-ı Hümâyûn’a takdîm edilerek Paşa’nın mezâlim ve seyyiâtı sâbit görülüp Filibe’de Mikdâd Ahmed Paşa ve Amasya’da bunun ile Gözdaşoğulları Hacı Mustafa, Ebûbekir ağalar i’dâm edildiler. Her üçü de Mikdâd Ahmed Paşa’nın ef’âline kurbân oldular. [552]