Hacı İlyâs Mahallesi eşrâfından Hacı Ali Ağa bin Hacı Mansur Ağa’nın oğludur. Evâ’il-i hâlinde sipâhi [547] olarak Rumeli ve Girit muhârebelerine iştirâk ederek terakkîler gördü. Amasya’da sipâhi kethüdâyeri, cizye muhassılı, Sivas vilâyeti cizyedârı olarak temâyüz etdi.
Bir müddet Hüseyin ve Firûz Ağaların vakfına mütevellî ve Meclis-i a’yân a’zâsı, mükerreren şehir kethüdâsı oldu. 1111’de Amasyalı Sefer Ağazâde Elçi Mehmed Paşa Şam vâlisi ve emîrü’l-hâc oldukda Surre-i Hümâyûn emîni olarak Hicâz’a gitdi.
1112’de Hâcdan avdet esnâsında Ma’an civârında urbân eşkiyâsı Hâc kâfilesini basdıkda merdâne müdâfaa ve emvâl-i mîrîyyeyi muhâfaza ederek şehîden vefât etdi. Amasya ricâlinden hânedân, yiğit, erbâb-ı servetden bir zât idi.
Oğulları el-Hâc Ahmed, Mehmed, Mustafa ağalarla vüzerâdan Köse Ali Paşa’dır. Hacı Ahmed ağa dergâh-ı âlî kapıcıbaşılarındandır. Oğulları Abdülkâdir, Mehmed ağalardır. Bunlar yukarıda yazıldı. Hacı Mehmed Ağazâde Abdülkâdir Efendi ve Hacı Mustafa Ağazâde Hacı Hâfız Mehmed, Hüseyin Ağalar da meşhûr olup bunlara ve bunların evlâdına “Hacı Kadirzâdeler” denir. [548]