Amasya helvâcılarından Hasan Ağa’nın oğludur. 1287’de doğdu. Balcı mektebinde Hattât Hacı Halil Efendi’den hıfz-ı Kur’ân ve Rüşdiye Mektebi’nde mukaddimât-ı ulûmu öğrenip ikinci derecede şehâdetnâme ahz etdikden sonra 1308’de İstanbul’a gitdi.

Perşembeli Ahmed Remzi Efendi’den sabah derslerine devam etdiği esnâda Harpûtî Abdullatîf, İçilli Süleyman Sırrî, Tokatlı Kasîr Ahmed, Köprülü Cemâleddîn, Limnili İbrâhim Efendilerden de istifâde etdi. 1316’da Ahmed Remzi Efendi’den mücâz ve açılan imtihânda muvaffak olup 1318’de alay müftüsü oldu.

Bu târihten itibâren Harput, Sivas, Çanakkale, Erzincan vilâyetlerinde vazîfe gördü. Tabur meclisinde a’zâ ve sonunda Erzincan Hastahâne-i Askerî meclisinde reis iken 1338’de vefât etdi. Âlim, beşûş, şekil ve sîmâsı latîf, biraz hadîd idi. Merhûm bütün tahsîl hayatında kardeşim idi. Afîf ve nezîh idi.