[532] Amasya Beylerbeyi Şihâbeddîn Şâdî Bey’in Amasya havâlîsinden aldığı kölesidir. Müşârün-ileyhin vefâtından sonra Mısır’a gönderilip ümerâdan Kâsım Bey iştirâ edib Allâme-i Alâeddîn Alî et-Türkmânî’ye satdı.
745’de allâme-i müşârün-ileyhin irtihâlinde i’tâkını vasiyyet eylediğinden evlâdı âzâd etdi. Bugünden i’tibâren allâme-i müşârün-ileyhin mahdûmu Taceddîn Abdullah bin et-Türkmânî’nin halka-i tedrîsine mülâzemet ederek ahz-ı ulûm edib üstâdı Mısır’da kâdı’l-kudâti’l-Hânefiyye oldukda müderris oldu.
Ders-i âm olduğu esnâda Ebû en-Nu’man el-Amâsî diye şöhret buldu. Ba’dehû Gazze, Remle kazâlarında bulunarak fazl ü adâletiyle iştihâr eylediğinden Kâdî-i Kudüs-i şerîf oldu. 791’de mütekâ’id olduğu hâlde 796 hudûdunda Mısır’da vefât etdi. “Zav-ı Lâmi’a”da mezkûr olduğu üzere âlim, fıkıh ve usûl ve ulûm-i’Arabiyyede bâri’ idi.