Gürcülerdendir. Câriye olarak Sultân Bâyezîd-i Sânî sarâyına girdi. Ba’dehû halîlesi olup Şehzâde Sultân Ahmed Hân’ı doğurdu. Mahdûmu 886’da Amasya vâlisi oldukda vâlide Sultân olarak devlete erdi.
912’de İçerişehir’de kendine mensûb olan Hâtuniye Mahallesi’nde bir Câmi-i şerîf, bir mekteb-i âlî ve imâret-hâne inşâsına mübâşeret edib 917’de hitâma erdi. Kezâlik Lâdik’de câmi ve hamam inşâ etdirdi. Bunların mesâlihine emlâkin vakf ve sene-i mezbûrede vakfiyesini tanzîm etdi.
918’de mahdûmu olan Şehzâde Sultân Ahmed, birâderi Sultân Selîm Hân’ın huzûrunda ihnâk edildiğini duyduğu anda kendisine ârız olan hinâk illeti huzûrunu selb edib 924’de Bursa’da vefât etdi. Sâlihât-ı nisâdan sâhibe-i hayrât bir hâtun idi. [536]
Vakfiyesinde evkâfının tevliyeti mahdûmu Sultân Ahmed Hân’ın benâtı evlâdına meşrût olduğundan ibtidâ Yularkısdı Sinan Paşazâde Mustafa Paşa’nın evlâdına, bunların inkırâzında Yeğenzâdelere intikâl etdi. Elyevm bunların uhdelerinde idi.