Amasyalıdır. Meşâhîr-i ümerâdan Bâyezîd Paşa’nın amcası Yûsuf Bey bin İsa Bey’in mahdûmu ve sadr-ı müşârün-ileyhin dâmâdıdır. Bâyezîd Paşa’nın sâye-i ikbalinde ümerâdan olup Sultân Murâd-ı Sânî’ye büyük hizmetler etdi.
838’de Anadolu Beylerbeyi olup Ankara’da bir müddet oturdu. 841’de Rûmeli beylerbeyi olup Sofya’da ikâmet etdi. 844 Karaman harbinde ibrâz-ı liyâkat eylediğinden vezâretle Edirne’ye gelip Divân-ı Hümâyûn’da kûbbe-nîşîn oldu.
846’da Fatih Sultân Mehmed Hân’ın birinci cülûsunda makâmını muhâfaza edib 847’de Varna muhârebesine Sultân Murâd-ı Sânî ma’iyyetinde gitdi. Muzafferen avdetde Sultân Murâd’ın ikinci defa [524] tahta cülûsunu te’mîn ederek vezîr-i sânî olduğu halde 848’de vefât etdi. Şecî, müdebbir, sâdık bir vezîr idi.
Mahdûmları Bâyezîd, Ali Beylerdir. Bunlar da ümerâdan olduğu halde Fatih Sultân Mehmed Hân’ın ikinci cülûsunda İstanbul’un fethini müteakib Amasya’da ikâmete me’mûr oldular. Bâyezîd Bey, Bâyezîd Paşa’nın vakfı mütevellîsi ve Ali Bey de Hâtun Paşa vakfı mütevellîsi olarak 865’de Amasya’da görüldüler. Sahîb-i tercemenin birâderi Sinan Paşa’dır.