Sultân Murâd Hân-ı Evvel’in Ankara’dan çıkarıb Amasya emâretine ilticâ eden Emîr Nasıreddîn Bahtiyâr Bey bin Emîr Taceddîn Devletşâh bin İsmail Hân bin Süleyman Padişah bin Nâsıreddîn Devletşâh-ı mezkûrun mahdûmudur.
Amasya Emîri Hacı Şâdgeldi Paşa’nın hizmetinde terakkî ederek ümerâdan olup emîr-i müşârün-ileyhin irtihâlinde mahdûmu emîr-i kebîr Devâtdâr Ahmed Paşa’ya inkiyâd etdi. Rûmeli muhârebâtında Yıldırım Sultân Bâyezîd Hân’ın ordusunda isbât-ı vücûd ederek mîr-livâ olmuşdu. [558]
Ancak Çorumlu sancağında eşkıyâvârî hareket ederek köyleri basıb yağma ve ğâret etdiği Yıldırım Sultân Bâyezîd’a şikâyet edildiğinden bâ-fermân-ı âlî te’dîbine Amasya vâlîsi Devâtdâr Ahmed Paşa me’mûr oldu. Ahmed Paşa yanına aldığı kuvvetle Çorum şehrini muhâsara eylediğinden kaçıb Kâdı Burhan’a ilticâ etdi.
Bundan sonra yanında bulunan hayli Tatar askeri ile aralık aralık Tokat’a hücûm eder, köyleri basar, halka zâlimane iz’âc ederdi. Devâtdâr Ahmed Paşa kendi lutfu sayesinde tahsîl-i emâret eden bu şerîrin muhârebesinde şehîd oldu.
804 senesi zilhiccesinde Topal Timur’un galebesine hizmet eylediğinden dolayı nüfûz ve itibara nâil olup Timur Hân tarafından Amasya vâlîsi edilerek i’zâm edildi. Bütün kuvvetiyle gelip Amasya’nın şimâl boğazı önünde kâin Hakala Kasabası havâlisine indi.
Çelebi Sultân Mehmed Hân tarafından Amasya vâlîsi olan Yâkût Paşa’ya Amasya’nın erkân ü halkı fevkalâde [559] müzâheret eylediğinden Amasya’ya giremedi. Ba’dehû Amasya halkı kendisinin mezâlim ve seyyiâtından Timur Hân’a şikâyet etmekle 805 senesi rebîülevvelinde Amasya emâretinden azl edildi.
Fakat başında bulunan on iki bin kadar kuvvetle her tarafı târâc ve iz’âc etmekde iken Amasya erkânının davetiyle Bolu’dan gelen Çelebi Sultân Mehmed Hân’ın ma’iyyetindeki beş yüz kadar fedâkârânın şiddetle hücûmuna karşı kendisi maktûl ve ordusu münhezim ve perişân oldu. Ahvâl ü seyyiâtı birinci bâbda ber-tafsîl yazıldı. Oraya mürâca’ât.