Amasya’nın Çeribaşı Mahallesi’nde mukîm fuzalâdan Abdullatîf Efendi bin Hoca Mehmed İlmî Efendi’nin mahdûmudur. Pederinin hayatında hıfz ve ahz-ı vücûh ederek huffâz-ı kirâm zümresine girdi. Pederinin vefâtında Sultân Bâyezîd imâreti şeyhi ve 1082’de Sultân Bâyezîd câmii imâm-ı evveli iken vefât eden Hâfız Ahmed Efendi’nin yerine rebîülevvelinde câmi-i mezkûr imâm-ı evveli oldu.
Ba’dehû ikmâl-i tahsîl ederek ders-i âm ve şeyhü’l-kurrâ olup Sultân Bâyezîd Câmii hatîbi olup yıllarca tedrîs-i vücûh ve ta’lim-i Kur’an ile iştigâl ederek 1133 senesi şâbânında dâr-ı naîme irtihâl etdi. Ulemâ ve sülehâdan bir şeyhü’l-kurrâ idi.
Ganizâde es-Seyyid el-Hâc Halîl Efendi’nin dâmâdı olup mahdûmları es-Seyyid Abdüllatif, Mehmed Emin Efendiler ile vüzerâdan es-Seyyid Abdülgani Paşa’dır ki târihen es-Seyyid Abdî Paşa demekle meşhûrdur. Es-Seyyid el-Hâc Abdüllatîf Efendi “Emîr İmâm” demekle meşhûr olduğu gibi [431] birâderi es-Seyyid el-Hâc Abdullatîf Çelebi de “Emîr-Hacı” demekle meşhûrdur.
Kudâtdan Kara Kâdızâde Halîl Efendi bin Mehmed Efendi Kurşunlu Mahallesi’nde sakin ve ceddi vakfına mütevellî olup bu esnâlarda vefât etdi. Kezalik a’yândan Kepekcizâde el-Hâc Halîl Ağa bin Mehmed Ağa da 1134 hudûdunda vefât etdi. Mahdûmu el-Hâc Osmân Ağa da a’yândan idi.