Amasyalıdır. Esbak Nakîbü’l-eşrâf kâ’im-makâmı Havzalı es-Seyyid Muhyiddîn Mehmed Hüseynîzâde es-Seyyid Şemseddîn Ahmed Efendi’nin mahdûmudur. Amasya ulemâsından tahsîl-i ulûm edib ders-i âm ve müderris olup Mehmed Paşa müderrisliğinden kâdı oldu. [316]
Hâce-i sultânî Şeyhü’l-İslâm Saadeddîn Efendi’nin ve mahdûmlarının teveccühâtını kazanıb Kayseriye, Gelibolu, Ankara gibi bilâd-ı mühimmede kâdı olarak mevâlîden oldu. Ba’dehû 1020’de Amasya nakîbü’l-eşrâf kâ’im-makâmı ve sonra mütekâid olup 1037’de vefât etdi.
Ulemâ-yı kudâtdan bir zât-ı sütûde-simât idi. Mahdûmu es-Seyyid Hasan Çelebi’dir. Bunun oğulları es-Seyyid Mahmûd İbrâhim Çelebilerdir. Es-Seyyid Mahmûd Çelebizâde es-Seyyid İbrâhim Çelebi’dir. Bunlara Haydarzâdeler dendi.