Amasyalıdır. Mülûk-i Dânîşmendiyye serdârı olan emîr-i meşhûr Nâsırü’d-devle İltekin Gâzinin ikinci mahdûmudur. Amasya’da Efrumiye Bânu’dan doğdu. Emîr İsmail Gâzi Bey’in zamanında Merzîfon Emîri oldu.
Hayli müddet orada emâret edib câmi yaptırdı. “Sehmü’d-devle” demekle meşhûr olan çiftliğini bu câmi-i şerîfin mesâlihine vakf etdi. Sonra bu çiftlik Sehmü’d-devle karyesi diye şimdiye kadar meşhûr olup kaldı.
518’de Dânîşmendiyye hükümdârı olan Melik Sungur Gâzi Bey’in Amasya’da yerleşdiği esnâda gelip arz-ı inkıyâd ederek ümerâsından oldu. Fakat birâderi Emîr Hüsamü’d-devle Hasan Gâzi Bey’le arası açıldığından 522’de Şam hükümdârı [3] olan Tâcü’l-mülûk Ebû Said Böri Bey bin el-Melik Tuğtekin Bey’in nezdine gidip ona intisâb etdi.
526 senesi recebinde Böri Bey’in vefâtıyla sırası üzerine Şam hükümdârı olan oğulları İsmail, Mahmûd, Mehmed Beylerin zaman-ı hükümetlerinde sâdıkâne hizmet eylediğinden Mehmed Bey’in zaman-ı hükümetinde 534 senesinde Humus Emîri oldu.
Müşârün-ileyhin bu sene şa’bânında vefâtıyla mahdûmu Mecidüddîn Abak Bey¹ Şam hükümdârı oldukda ibtidâ müşârün-ileyhe inkıyâd ve mütâbaat etdi. Sonra araları bozulduğundan Hama’yı zabt ve istilâ ederek i’lân-ı istiklâl eyledi. Nâmına hutbe okutdu.
549 senesi saferinde Melik Nureddîn Mahmûd bin Zengi Şam hükümdârının zaaf-ı idâresini görüb asâkir-i mevcûdesiyle Şam’ı muhâsara ederek altı gün sonra zabt ve istilâ eylediğinden Abak Bey’i Emîr-i Humus nasb etdi. Muahharan sâhib-i terceme Melik müşârün-ileyhe inkıyâd eyledikde Abak Bey’e Nablus sancâğını verib kendisini Humus ve Hama emâretine ibkâ eyledi. Ancak ba’zı hususât-ı idâriyede Melik-i müşârün-ileyhe [4] karşı istiklâl teşebbüsâtına kıyâm edeceği zan edilmekle Humus emâreti ile celb ve itma’ edilen kölesi Karatigin tarafından 554’de i’dâm edildi. Gâyet şeci’, mukdim bir emîr-i nâmdâr idi. Buna Sihâmü’d-devle de denirdi.