Amasyalıdır. Selçuk Beylerinden Amasya’da medrese ve türbesi olan Emîr Mübârizeddîn Halîfe Alp bin Tuli Mehmed Bey bin Türkân Şâh mahdûmudur. Buna “Halfetoğlu” dendi. Pederinin zamân-ı emâretinde iştihâr edib hayli muhârebelerde isbât-ı ehliyet ederek nâ’il-i emâret oldu.
647’de Canik ve havâlîsi emîri olup emîrü’l-sevâhil unvânı altında Karadeniz kumândânı oldu. Yıllarca buraları Trabzon krallarına karşı hüsn-i müdâfa’a edib 654’de Sultân Rükneddîn Kılıç Arslan’a nâib-i saltanat oldu. 658’de vefât eyledi.
Meşâhîr-i ümerâ-yı Selçukiyye’den olup pederinin evkâfına mütevellî, kerîm, şecî’ bir zât idi. Mahdûmu emîr-i meşhûr Celâleddîn Mehmed Pervâne Bey Amasya vâlîsi olmuştu. Bunun evlâdı 1140 târîhlerine kadar devâm etdi. “Ebu’l-oğulları” bunlardan olmalıdır. El-yevm tevliyet Güllükoğullarından Abdullah Efendi evlâdındadır.[49]