Lâdiklidir. Orada medfûn sâhibü’l-hâl es-Seyyid Ahmed-i Kebîrü’r-Rifâ’î evlâd-ı kirâmından es-Seyyid Muhyiddîn Mehmed Çelebi bin es-Seyyid Alâeddîn Alî Çelebi bin es-Seyyid Ahmed-i Kebîrü’r-Rifâ’î mahdûmudur. [509] Amasya’da tahsîl-i ulûm edib 783’de Hacı Şâdgeldi Paşa’nın maktûlen vefâtı vak’asında Irâk’a gitdi.
Bağdâd’da ikmâl-i tahsîl edib seyâhate çıkdı. Basra, Şam, Kudüs, Hicâz, Haleb vilâyetlerini gezib Kayseriyye’de ikâmet edib es-Seyyid eş-Şeyh Zeynelâbidîn Çelebi Zâviyesi’ne yerleşti. Müşârün-ileyhin kerîmesini tezevvüc ederek halîfesi ve dâmâdı oldu.
815’de şeyh-i müşârün-ileyhin vefâtına binâen zâviyesi şeyhi olup yirmi dört yıl kadar icrâ-yı meşîhat, halka va’z ü nasîhat ederek müreffeh bir hayât geçirdi. 839’da vefât edib kayın pederinin yanına defnedildi. Âlim, kâmil, zâhid, müteşerri’, mazınne-i kerâmet, sütûde-sîret bir zât idi. Evlâdı Kayseriyye’de devam edib bunlardan Medîne-i Münevvere müftüsü es-Seyyid Es’ad Ahmed Efendi bunun sülâlesi ve evlâdı hakkında “el-Müselselât” adlı bir kitâb-ı matbu’ te’lîf etdi.