Erzurum vilâyeti mülhakâtından Bayburd kasabasından Alî oğludur. Genç iken Köprü’ye gelip orada tavattun etdi. Çomuluzâde Hacı Alî Paşa’nın silahdârı ve mahdûmu Mehmed Emîn Bey’in kethüdâsı olarak fevka’l-âde servet ü şöhret kazandı.

1220’de Mehmed Emîn Bey’i bâ-fermân-ı âlî ref’ ederek Köprü voyvodası ba’dehû Amasya mübâya’acısı olup dergâh-ı âlî kapıcıbaşılığı rütbesiyle taltîf edildi. 1224’de Amasya a’yânı ve mütesellim vekîli olup Rus harbine me’mûren gitdi.

Muhârebe esnâsında Ruslar’a esîr olup 1228’de tahlîs edilerek avdet etdi. Köprü’de menkûben ikâmet edib 1235 senesi evâ’ilinde vefât etdi. Mâlik olduğu Ersandık çiftliği evlâdına kaldı. Köprü’de “Bayburdluoğulları” bunun evlâdıdır. Çiftliğe müste’cîren giren Canik Rûmları mu’ahharan iddi’â-yı tasarrufla sâhiblerini def’ etmişlerdi. [505]