Amasyalıdır. Alî bin Mehmed oğludur. Vüzerâdan Dağıstânî Alî Paşa’nın dâ’iresi ağalarından olup onun 1194’de i’dâmında Sivas hânedânından Zaralızâde Receb Paşa’ya intisâb etdi. Onun zamân-ı vezâret ü vilâyetinde kethüdâsı olup hayli nüfûz u şöhret kazandı.
Receb Paşa’nın gerek zamân-ı vezâretinde ve gerek evân-ı nekbetinde hem-dem ü gâm-güsârı olduğundan vefâtına kadar ondan ayrılmadı. 1218’de Paşa’nın ikinci def’a azli ile vezâretinin ref’ ve müte’âkiben vefâtında Amasya’ya geldi. Ba’dehû Cebbârzâde Celâleddîn Mehmed Paşa’nın dâ’iresine intisâb edib onun da kethüdâsı oldu.
Paşa’nın sâye-i ikbâlinde dergâh-ı âlî kapıcıbaşılığı rütbesini alıp nüfûz u i’tibârı arttı. Çünkü Rus muhârebesinde Sivas vilâyeti kâ’im-makâmı olup erzâk ve mühimmât-ı [500] askeriyyenin tedârik u irsâlinde hizmetler etmişdi. 1228’de vefât etdi. Müdebbir, idâre-i umûra vâkıf, zî-nüfûz bir zât idi.
Oğulları Mehmed, Alî Ağalara “Kethüdâzâdeler” dendi. Amasya’da Hacı Hamza Mahallesi’nde pederlerinin mükellef konağında ikâmet etmişlerdi. 1254 senesi tahrîr-i nüfûsunda el-Hâc Mehmed Ağa ber-hayât olup oğulları Hasan, Ahmed Ağalar mahalle-i mezbûrede mukayyed idiler.