Amasyalıdır. Yukarıda tercemesi yazılan Ahî Recebzâde el-Hâc Bayram Efendi bin Ramazân Çelebi bin Şa’bân Çelebi bin Ahî Receb Kazâbâdî mahdûmudur. Amasya’da ikmâl-i tahsîl edib ders-i âm oldu.
Bir müddet tedrîs-i ulûm etdikten sonra İstanbul’a gidip Semiz Ahmed Paşa’ya intisâb ederek müşârün-ileyhe mu’allim ve Kara Çelebi Efendi’den mülâzım olup 981’de Tûtî Latîf Medresesine müderris oldu. [37]
Ba’dehû buradan infisâl etdikte 983’de Edirne’de Şeyhî Çelebi Medresesi müderrisi olup 886 senesi ramazânında Rodos müftüsü ve orada kâ’in Süleymaniye müderrisi oldu. 988 senesi rebîülevvelinde Ahmed Paşa’nın vefâtından sonra sene-i mezbûre Şa’bânında azl edildi.
İstanbul’a vusûlünde tekâ’üd vazîfesi verilip 990 hudûdunda vefât etdi. Âlim, sâlih, emîn, bir pîr-i muhterem idi. Sadr-ı esbak Kara Ahmed Paşa’nın da mu’allimi ve irtihâlinde vasiyy-i muhtârı olup Topkapı’da kâ’in câmi-i şerîfi ve medresesi binâsına nezâret etmişdi. Mahdûmu mevâliden Mehmed Efendi’dir.