Amasya havâlîsinde meskûn Türklerden Ohtal/Oktal adlı bir kimsenin mahdûmudur. İmzâsı “Receb bin Ohtal” diye görüldü. Amasya fuzalâsından Mevlânâ Fahreddîn İlyâs İbnü’l-Aksarâyî’den ikmâl-i tahsîl ederek ders-i âm ve müderris-i be-nâm oldu.
Amasya kadı-l-kudâtı Mevlânâ Mü’eyyideddîn Mehmed bin el-İmâdü’l-Amâsî kâtibi, ba’dehû nâibi olarak temâyüz edib Havza, Merzifon, Kedağra kadısı oldu. Amasya emâreti Sultân Murâd-ı Hünkâr’a arz-ı inkıyâd eylediği esnâda Taşanzâdeleri Âl-i Osmân’a inkıyâd etdirip Yıldırım Sultân Bâyezîd Hân’ın teveccühâtını kazandı.
795’de evkâf-ı Rûmiyye müfetdişi ve Çorumlu [32] kadısı oldu. Altunbaş-ı Selçukî vakfiyesiyle sâ’ir birkaç vakfiye bâlâsında bu sûretle imzâsı görüldü. Ba’dehû vefât eyledi. Meşâhîr-i ulemâ ve kudât-ı sütûde-simâtdan bir zât-ı kâmil idi.
Diğer ulemâdan Mevlânâ Receb bin Şa’bân-ı Amâsî de 807’de ders-i âm ve müderris-i be-nâm ve 817’de kibâr-ı ulemâdan görüldü. Ba’dehû vefât eyledi. Meşâhîr-i ulemâdan muhibb, sûfiyye bir zât idi. Eş-Şeyh Cû’î Çelebi vakfiyesiyle hilâfet-nâmesinde şuhûd-ı hâzıradan görüldü.