Köprülüdür. Oranın vücûhundan Mehmed Ağa’nın mahdûmudur. Köprülü Mehmed Paşa’nın etbâ’ından iken vefâtında mahdûmu Fâzıl Ahmed Paşa dâiresine girdi. Etrâf-ı vilâyâta me’mûriyetle gönderildiğinden ma’rûfiyet kazandı.
Paşa-yı müşârün-ileyhin de vefâtından sonra Köprülü Paşa’nın dâmâdı Siyavuş Paşa’ya kapılandı. Müşârün-ileyhin vezâret ve sadâretinde kethüdâsı olduğundan nüfûz ve ikbâli fevkalâde arttı.
Ancak Nişâncı İsmail Paşa gibi ba’zı zevâtı kethüdâlığında [119] gücendirdiğinden 1099 rebîülevvelinde Sadr-ı a’zam Siyavuş Paşa’nın âsîler tarafından şehîden vefâtı üzerine Rumeli Beylerbeyliği pâyesiyle Niğbolu muhâfızı olup gitdi. Nişancı İsmail Paşa muahharan Sadr-ı a’zam oldukda aleyhinde bir çok şeyler isnâd edilerek 1099 ramazanının sekizinde gönderilen me’mûr elinde maktûlen vefât etdi. Erbâb-ı cerbezeden idi.