Amasyalıdır. Alaybeyilerden Fethullâh Ağa’nın mahdûmu ve Abdullah Bey’in birâderidir. Züamadan iken tahsîl-i ilm ü irfân edib üdebâdan oldu. Ba’dehû Amasya alaybeyi olup Rus muhârebelerine iştirâk ederek terakkî gördü.
Ancak Caniklizâdelerle iştirâk-i mesâ’î edemediğinden ihtiyâr-ı uzlet ve edebiyât ile iştigâl ederek 1221’de vefât etdi. Şâ’ir, hoş-sohbet, meclis-ârâ bir kimse idi. Sâz ve satranç ve tavla oyunlarında mâhir olduğundan “Tavlacı Sâlim Bey” demekle meşhûr oldu. Dîvânçe-i eş’ârı kısmen bulunduğu hâlde ma’alesef yandı.