Amasyalıdır. Pederinin adı Abdullah’dır. Amasya hükümdârı Hacı Şâdgeldi Paşa devrinde tahsîl-i ulûm ederek Mevlânâ Saîdeddîn Mevhûb bin ez-Ziyârî ve Mevlânâ Cemâleddîn Mehmed bin el-Aksarayî gibi fuzalâdan mücâz ve ders-i âm oldu. Bâ’dehû Atabeg Medresesi müderrisi olup fesâhat-ı beyânı, selâset-i takrîri, uzûbet-i lisânı sâyesinde iştihâr etdi.
Topal Timur tarafından ta’yin edilen Kara Devlet Şâh’ın Amasya vâliliğine itirâz eylediğinden Topal Timur’un hafîdi Kara Mehmed Sultân’ın 805’de Amasya’ya vürûdu esnâsında Arabistan’a firâr edib Halep’e gitdi. Oranın vâlisi Emîr Şeyh Müeyyedî kendisine riâyetler etdi.
Emîr-i müşârün-ileyh Mısır’a Sultân oldukda Kudüs’de tavattun edib Sultân-ı müşârün-ileyhin burada binâ eylediği medresesi müderrisi oldu. Müstevfî-i ta’yinâta nâil olup tedrîs ve tezkîr ile imrâr-ı hayat ederek 828’de vefât etdi. Fâzıl, elsine-i selâse ile mütekellim, vâiz, natûk, fasîhü’l-lisân, azbü’l-beyân idi. Bu münâsebetle “Mevlânâ Şeker Çelebi” dendi.(İnsü’l-Celîl) [151]