Amasyalıdır. “Yürigin Dede” demekle meşhûr Şemseddîn Ahmed Çelebizâde Mehmed Çelebi mahdûmudur. Amasya ve İstanbul fuzalâsından ahz-ı ulûm edib Sultân Bâyezîd-i Sânî Amasya vâlisi iken Amasya’da ders-i âm ve Hüsamîyye müderrisi oldu.
Ba’dehû Sultân-ı müşârün-ileyhin cülûsunda sânîyen İstanbul’a gidip Mahmûd Paşa, ba’dehû Kalenderhâne ve sonra Edirne’de Dârü’l-Hadîs [153] Medreselerine sırasıyla müderris oldu. 907’de Amasya müftüsü ve Sultânîyye müderrisi olduğu halde Amasya’ya gelip iki yıl kadar iftâ ve tedrîs ederek 909’da vefât eyledi.
Meşâhîr-i ulemâdan muhakkik, fâzıl, gâyet fakîh, kâmil, takrîr ve beyânı mükemmel, fasîh bir zât idi. “Şakâyık Tercemesi”nde Mecdî Mehmed Efendi diyor ki; “Akrân ve emsâli ortasında hüsn-i takrîr, dil-pezîr ve lutf-ı muhâvere-i bi-nazîr ile fasîhü’l-lisân, melîhü’l-beyân olup ulüvv-i şân ve sümüvv-i mekân ile celîlü’l-meâb, cezîlü’l-nisâb idi. Cümle-i ulûmda müşâreket-i ilmiyyesi olduğundan gayri ilm-i fıkıh ve usûlde yed-i tûlâsı var idi.” Mahdûmu Fikri Mehmed Çelebi meşâhîr-i şuarâ ve ulemâdandır.