Amasyalıdır. Zanalızâde es-Seyyid Şerîf Mehmed Efendi’nin dâmâdı Zaîm Ali Ağa’nın mahdûmu ve Şerîf Efendi’nin kerîmezâdesidir. 1161 saferinde doğdu. Gençliğinde İstanbul’a gidip kethüdâ kalemine çerâğ edildi.
Burada tedrîcen tefeyyüz ederek 1185’de Arabacılar kitâbetiyle tarîk-i hâcegâna girdi. 1186’da Tezkîre-i sânî olup 1187’de azliyle Amasya’ya i’zâm edilerek Sultân Bâyezîd-ı Sânî evkâfı mütevellîsi oldu.
1191’de İstanbul’a avdetini müteâkib Harameyn muhâsebecisi ve 1192’de defterdâr mektûbçusu olup 1193 [109] şevvâlinde teşrifâtçı ve zilhiccesinde kethüdâ kâtibi oldu. Ancak kethüdâ-yı sadr-ı âlî olan Halil Hamid Paşa ile geçinemediğinden 1194’de azledilip 1195’de baş muhâsib oldu.
1197’de Halil Hamid Paşa’nın sadâretinde açıkta kalıp ba’zı evkâf-ı cesîme tevliyetiyle imrâr-ı vakit ederek 1205 rebîülâhirinde Ordu-yı Hümâyûn’da baş defterdâr oldu. 1207 şâbânında azledilip 1208 ramazanında bâruthâne nâzırı 1209 muharreminde baş-muhâsebeci ve cumâdelûlâsının ondördünde kethüdâ-yı sadr-ı âlî oldu.
1209 recebinde ilâveten baruthâne nâzırı ve şevvâlinde her ikisinden de azliyle rûznâme-i evvel ve 1210 cumâdelûlâsında sânîyen kethüdâ-yı sadâret ve nâzır-ı baruthâne oldu. 1213 senesi saferinin yirmi dördünde kethüdâlıkdan azil ile defter emîni ve zilka’desinin dokuzunda rikâb-ı hümâyûn defterdârı oldu.
1214 senesi muharreminde tersâne emîni 1216 rebîülevvelinde Mısır Defterdârı olup Vali Hüsrev Paşa ile geçinemediğinden 1217 senesi cumâdelûlâsında isti’fâ etdi. Müteâkiben [110] vezâretle Cidde ve Habeş vâlisi oldu. Ancak bir yıl kadar vâlilik ederek 1218 senesi cumâdelâhiresinde Cidde’de dâr-ı bekâya rihlet etdi.
Vezîr-i müşârün-ileyh sâdık, müstakîm, muktedir, sahî, güler yüzlü idi. Halilesinin isrâfından dolayı hayli paraya mâlik olduğu halde güç idâre bildi. Mahdûmu mevâlîden Saîd Siret Bey 1246’da vefât etdi. Şâir idi. Bunun mahdûmları şâir-i heccâv Nihad Bey ile Küçük Şerîf Mehmed Paşa’dır.
Ahfâdından biri de Avni Mehmed Bey olup yeğeni dergâh-ı âlî gediklilerinden Mustafa Ağa’dır. Küçük Şerîf Mehmed Paşa 1293 rebîülâhirinde reis-i nuzzâr iken vezâret verilmiş, 1303’de Mısır’da vefât etmişdir. Erkân-ı Mısrıyyeden idi.