Merzifon kazâsı dâhilinde Zuğu nâhiyesi eşrâfından za’îm Osmân Bey’in mahdûmudur. Pederinin vefâtında ze’âmet tîmârı birâderi Cevher Bey’le nısfıyyet üzere uhdesine tevcîh edilerek züamâdan oldu.
1135’de Îrân muhârebâtının ibtidâsında harbe gidip yıllarca mütemâdiyen Îrânîlerle çarpışdı. 1143’de Hemedan muhâfazasında sebât u metânet ibrâz edib terakkî gördü. 1150’de Nâdir Şâh’a karşı muvaffakiyetli bir muhârebeyi kazandığından 1151’de Aksaray sancâğı beyi oldu.
1153’de Nâdir Şâh’ı bulunduğu mevki’den püskürtüp yararlıklar gösterdiğinden sene-i mezbûre cumâdelûlâ gurresinde bâ-rütbe-i mîr-i mîrânî Amasya mutasarrıfı oldu. Bu mükâfattan cesâret alıp Nâdir Şâh üzerine fedâkârâne savlet [67]ve onu firâra mecbûr eylediğinden 1154 senesi şa’bânının gurresinde vezâretle Sivas vâlîsi oldu.
Hayfâ ki ma’iyyetinde bulunan fedâkârânın azlığı ve Nâdir Şâh’ın kuvve-i umûmiyyesiyle hücûmu karşısında sâbit-kadem olarak fedâkârâne harb ederken 1155 senesinde şehîden vefât etdi. Şecî’, mukdim, gâyet cesûr bir vezîr idi. Mahdûmu Osmân Paşa’dır.