Amasyalıdır. Amasya mevlevîhânesi şeyhi olup 1227’de vefât eden es-Seyyid Kâmî Mehmed Dede bin es-Seyyid Gavsî Ahmed Dede bin Sa’îd İbrâhim Dede bin Ebu Sa’îd Ahmed Dede bin Hacı Mehmed Çelebi mahdûmudur. Şeyh Cû’î Mehmed Dede evlâdından olduğu mervîdir.
Pederinden edebiyât-ı Fârisiyye ve Arabiyyeyi ahz edib Şeyh Cû’î tekkesi mesnevîhânı oldu. Bu vazîfesini Amasya mevlevîhânesinde îfâ edib 1227’de pederinin irtihâlinde mevlevîhâne şeyhi olmuştur.
Fakat pederinin ammizâdesi es-Seyyid Hüseyin Dede Efendi’nin mahdûmu es-Seyyid Mehmed Dede teşebbüsâtıyla bir yıl sonra ref’ edildiğinden Konya’ya gitdi. Orada tûl müddet ikâmet ederek 1243’de vefât etdi. Urefâ-yı Mevleviyyeden şâir, edîb idi. Mahdûmu es-Seyyid Ahmed Sâlim Dede’dir.[70]