Amasyalıdır. Ya’kûb Çelebi bin Ahmed Çelebi mahdûmu ve meşâhîr-i ulemâdan Hatîb Kâsım Efendi’nin birâderidir. Kardaşından tahsîl-i ilm ve edeb ve Şeyh Hamdullah Efendi’den ahz-ı hâtt ederek Şehzâde Âlemşâh bin Sultân Bâyezîd-i Sâni’ye intisâb etdi.

896’da Şehzâde-i müşârün-ileyh Saruhan vâlîsi olup giderken defterdârı olup beraber gitdi. 911’de Şehzâde orada vefât etdikde mahdûmu Osmân Bey’e lala olmuşdu. 918’de Sultân Selîm-i Evvel’in cülûsunda Osmân Bey dâr-ı ukbâya gitdiğinden Amasya’ya avdet ve bir kaç yıl sonra vefât etdi. Kâtib, edîb, âlim idi.