Amasyalıdır. Dânîşmendiyye hükümdârı Melik İzzeddîn Mehmed Gâzi bin Melik Dânîşmend Ahmed Gâzi şehzâdesidir. Amcası Melik Seyfeddîn İsmail Gâzi zamanında Amasya’da doğdu. Ba’dehû pederi hükümdâr oldukda Kayseriye emîri oldu.
Ba’dehû pederi Amasya’dan Kayseriye’ye gidip agleb ihtimâle göre 537’de vefât eyledikde Kayseriye’de ilân-ı emâret ve istiklâl etdi. Ancak bir taraftan ammizâdeleri Sungur ve Yağıbasan Gâzilerin ve diğer taraftan büyük birâderi İbrâhim Gâzi’nin kıyâm ve emâretleri ve yek diğerleriyle muhârebeleri temâdî eyledi.
Bundan istifade eden Sultân Mes’ûd-ı Selçûkî Memâlik-i Dânîşmendiyyeyi işgâl ve istîlâ etdiği esnâda müşârün-ileyhe Amasya’nın garb-ı cenûbîsinde kâin olup el-yevm Mecidözü nâmıyla meşhûr olan kazânın emâretini verdi. O kazâda [575] emâret ve 550 sâlinden sonra dâr-ı bekâya rihlet etdi. Selâtin-i Dânîşmendiyyeden ma’dûd idi.
Kadîmen Mecidözü kazâsı Zünnûn-âbad, Zünnûn-özü ve tam Türk Lehçesiyle Tanûn-özü diye meşhûr ve evrâk ve kuyûd-ı atîkada bu nâmlarla mezkûr oldu. Muahharan Abdulmecid Bey’in nâmıyla iştihâr edib Mecidözü dendi. Eski Tanûn özü “Zünnûn özü” demektir.