Amasya Nakîbü’l-eşrâf kâim makâmı es-Seyyid Mehmed Çelebi oğludur. Amasya’da ikmâl-i tahsîl etdikden sonra ders-i âm ve müderris-i be-nâm oldu. 961’de Amasya’ya gelen Kânûnî Sultân Süleyman Hân’ın ordusuna katılıp İstanbul’a gitdi.
Orada Rumeli Kazaskeri Amasyalı Abdurrahman Efendi’ye mülâzemetle müderris ve kırkdan munfasıl iken müşârün-ileyhin azlinden sonra meslek-i kazâyı kabûl ederek kasabât ve bilâda kadı oldu. Müşârün-ileyhin ikinci defa sadâretinde vilâyet merkezlerine kadı olduğu halde 983 senesi hilâlinde vefât etdi. Kibâr-ı kudâtdan âlim, kâmil bir seyyid-i zîşân idi. “Kadı Çelebi” demekle meşhûrdur.