Amasya sâdâtından es-Seyyid Mehmed Ağa’nın mahdûmudur. Amasyalı Ocak imâmı es-Seyyid Halîl Efendizâde sadâret kâ’im-makâmı es-Seyyid Mustafa Paşa’nın dâ’iresine efendiliğinde intisâb ederek vezâretinde çuhadârı ve dâmâdı ve kâ’im-makâmlığında kethüdâsı oldu.
Müşârun ileyhin tekâ’üdünden sonra bir müddet Amasya’da ikâmet [61] ve ba’dehû kayın pederinin lütûf-dîdesi olan Gürcü Yûsuf Ziya Paşa’ya intisâb ederek sadâretinde kapıcıları kethüdâsı oldu. Mısır’ın fethinde dergâh-ı âlî kapıcıbaşılığı ile taltîf edildi.
1220 senesi muharreminde müşârun ileyhin sadâretten azli üzerine Gümüşhane ma’deni emîni ve 1223 senesi evâsıtında bâ-rütbe-i mîr-i mîrânî Kars Kalesi muhâfızı oldu. 1225’de Ahısha Muhârebesi’nde kuvve-i imdâdiye irsâl ederek hizmet eylediğinden zilka’desinde nâ’il-i vezâret oldu.
1226 senesi muharreminin evâsıtında Erzurum vâlîsi ve Kars muhâfızı olup iki yıl kadar hüsn-i idâre etmiş olduğu hâlde 1228 senesi muharreminin evâ’ilinde dâr-ı bekâya rihlet etdi. Kars’ta medfûndur. Erbâb-ı liyâkattan müdebbir, hâdim-i dîn ü devlet bir zât idi. Mahdûmları Mustafa, Mehmed Beyler Amasya’da oturdu.