Merzifonludur. Hazîne-i hümâyûn kethüdâsı Merzifonî Ebûbekir Efendi’nin akrabâsından Hüseyin Efendi’nin mahdûmudur. Gençliğinde İstanbul’a gidip Sarây-ı hümâyûna girdi. Orada bir müddet ta’lîm ve terbiye görüp sonra Bâb-ı âlîde kethüdâ kalemine çerağ edilerek baş-halîfe oldu.
1245’de Ebûbekir Efendi’nin himmetiyle yüzbaşı olup [515] Tophâne’ye me’mûr oldu. 1247’de binbaşı, 1255’de Miralay ve 1263’de Mîrlivâ olup 1267 saferinde tahvîlen Beylerbeyi olarak Rûmeli Sofya mutasarrıfı oldu.
1268 senesi rebiülevvelinde Niş mutasarrıfı ve şevvâlinde Belgrad muhâfızı ve 1269 zilhiccesinde ikinci defa Rûmeli mutasarrıfı oldu. Bu havâlîde olan hizmetleri karîn-i tahsîn-i âlî olduğundan 1270 senesi cumâdelûlasında rütbe-i vezâretle Yanya vâlisi oldu.
1271 senesi cumâdelûlâsında Yanya eşrâfının şikâyetleri üzerine infisâl edib 1272 saferinde Kürdistan, ya’nî Diyârbekir, Van vâlisi olarak Diyârbekir’e gitdi. 1274 recebinde oradan da infisâl ederek Amasya’ya gelip ikâmet etdi.
Sene-i mezbûrenin şa’bânı evâsıtında Hacı İlyâs Mahallesi’nde sâkin olduğu Gürcüzâde Deli Mustafa Bey’in konağında hastalandı. Ramazânın yirmi yedinci Kadir gecesinde bilâ-veled vefât etdi. Abdüllâtîf Efendi Kütüphânesi’nin [516] bahçesinde medfûndur. Müdebbir, fikr-i metîn, tab’an hadîd idi. Bilâ-veled öldüğü seng-i mezârında mahkûkdur.