Amasyalıdır. Beylerbeyilerden Rıdvân Paşa bin Bâkî Paşa mahdûmudur. Sadr-ı esbak Bayrâm Paşa’nın himmetiyle sarây-ı hümâyûna girip Enderûn’da terbiye gördü. Sultân Mehmed [520] Hân-ı Râbi’in cülûsunda taşra çıkarılıp Dîvân-ı hümâyun kâtibleri zümresine ilhâk edildi.
1065’de İbşir Paşa’nın kethüdâ-yı sadâreti olan eniştesi Sâlih Ağa’nın kâtibi oldu. Sene-yi mezbûre recebinde sadr-ı müşârün-ileyhin katlinde eniştesiyle beraber Amasya’ya gönderildi. 1067’de Köprülü Mehmed Paşa’nın sadâretinde İstanbul’a gidip Ankebût Ahmed Paşa’ya çatıp kâ’im-makâmlığında kâtib-i dîvânı olduysa da 1068’de menkûben Amasya’ya geldi.
1073’de Köprülüzâde Fâzıl Ahmed Paşa’nın himmetiyle Hüseyin Ağa ve Fîrûz Ağa evkâfı kâtibi olup 1090 hudûdunda vefât etdi. Şâ’ir, kâtib, me’ârif-âşinâ idi. Ancak Ankebût Ahmed Paşa’yı sadârete tahrîs etdiği söylenmekle menkûb olmuşdu.