Amasyalıdır. Esbak nakîbü’l-eşrâf kâ’im-makâmı Havzalı es-Seyyid Muhyiddîn Mehmed Çelebizâde es-Seyyid Haydar Efendi’nin mahdûmudur. Amasya’da kibâr-ı meşâyîhten Îcâdîzâde eş-Şeyh Muhyiddîn Mehmed Efendi’den tahsîl-i ulûm-ı şer’iyye ve iktisâb-ı ma’ârif-i sûfiyye edib va’z u tezkîr ile iştihâr etdi.
Ammizâdesi Şerîf Mehmed Paşa’nın kendisine mu’âveneten gönderdiği mebâliğ-i kesîre ile Çukurbâğçe’de yaptırdığı tekkesi şeyhi oldu. Hüseyin Ağa vakfının kâtibi, mükerreren nakîbü’l-eşrâf kâ’im-makâmı olup bunlardan bir kaç def’a azl u nasb edildi. 1036’da vefât eyledi. Âlim, vâ’iz, kâni’ bir seyyid-i zî-şân-ı Hüseynî idi. [141]
Selağzında iki dükkânını, Ayvasıl bağlarında bir kebîr bâğını bu tekkesine vakf etdi. Buna “Büyük Celâl Efendi” denirdi. Ammizâdesi es-Seyyid Şerîf Mehmed Paşa da tekkenin ta’âmiyesine hayli nukûd vâkf etmişdi. Mahdûmu es-Seyyid Yûsuf Çelebi bu vakıflara mütevvellî ve tekkeye şeyh oldu.