Amasyalıdır. Meşâhîr-i ulemâdan Benderli Medresesi müderrisi Çırakçızâde Hâfız Ahmed Efendi’nin birâderi Ali Ağazâde Seyyid Ahmed’in oğludur. 1278’de doğdu. Mekteb-i Rüşdiyeden ikmâl-i tahsîl ederek çıkıb bir müddet Mir Hasan Efendi’nin dersine devam etdi.
Bu esnâda nüfûs idâresi kalemine girib baş-kâtib oldu. Hayli müddet baş-kitâbetde kaldı. Haricen de tohum ticaretiyle iştigâl ederek oldukça bir servet edindi. Meşrutiyet devresinde tekâüde sevk edilib mebûsluğa hayli özendiyse de muvaffak olamadı. Sonra bir âile meselesi yüzünden 1343 senesi recebinin yirmi birinci pazar günü müntehiren vefât etdi.
Mûmâ-ileyh kısa boylu, nahifü’l-bünye, kâtib, oldukça âlim, şâir, çok sözlü, hod-pesend, latîf bir zât idi. Eş’ârından bir gazel yahud bir kıt’a taleb ve ricâ etdiğim halde vaadini her nedense incâz edemedi. Evlâdı vardır. [514]