Amasyalıdır. Müteaddid vakfiyelerden müstefâd olduğu üzere Ahmed Çelebi bin Abdurrahman Efendi’nin mahdûmudur. Gençliğinde Saray-ı Hümâyûn’a girib hâne-i hâssada ta’lîm ve terbiye gördü. Tedrîcen tefeyyüz ederek hasodabaşı oldu. Amasyalı Hacı Efendizâde el-Hâc Derviş Mehmed Ağa’nın kerîmesi Emine Hânım ile evlendi. [444]
Ba’dehû yoluyla Babü’s-Sa’ade Ağası olup Zanalızâde es-Seyyid el-Hâc Ahmed Paşa’nın sadâretinde temâyüz edib Rikab-ı Hümâyûn ağalarını taht-ı nüfûzûna aldı. 1155 senesi rebîülevvelinde Ahmed Paşa’nın sadâretden azli üzerine Surre-i Hümâyûn emîni olup taşra çıkarıldı.
1156’da Hicâz’dan avdet etdikde Sultân Mahmûd-ı Evvel’in irâdesiyle sânîyen hasodabaşı olarak Saray-ı Hümâyûna girdi. 1162’de has odadan çıkarılıb 1163’de sânîyen Babü’s-Sa’ade Ağası oldu. 1173’de ihtiyarlığına binâen tekâüde sevk edilib 1175 şevvâlinde vefât etdi. Sâlih, müstakîm, dindâr idi.
Kethüdâsı Sakazâde Mehmed Ağa bin Mustafa Ağa 1165’de vefâtıyla bunun birâderi Ömer Ağa kethüdâsı oldu. Bunlar da Amasyalıdır. Birâderleri Mehmed, Mustafa Ağalardır. Sadr-ı esbak Amasyalı Halîl Ağazâde Nâili Abdullah Paşa’nın akrâbasından bir pîr-i muhterem idi.