Amasyalıdır. Cebecizâde Mehmed Ağa bin Ali Ağa’nın mahdûmudur. Ceddi Sipâhiler Ağası olup pederi yeniçeridir. Hıfz-ı Kur’ân etdikden sonra Amasya’da şeyhü’l-kurrâ olan Giridli Hacı Hâfız Mehmed Efendi’den vücûh-ı kıraatı ve ilm-i tecvîdi aldı.
Ba’dehû İstanbul’a gidip orada “Şeker Hâfız” demekle meşhûr Hâfız Mehmed Efendi’den de ilm-i vücûhu alıb tahsîl-i ilm etdi. Yine Amasya’ya avdet edib Sultân Bâyezîd Câmi-i şerîfinde tedrîs ve ta’lim-i Kur’ân’a mübâşeret etdi.
Fakat ba’zı akrânın hasûdane istirkâbından muğber olup 1127’de Amasya’yı terk ederek Hicâz’a gitdi. Mekke-i mükerremede ba’zı a’yân-ı Kayseriyye’nin teşvik ve ricâsıyla Kayseriyye’ye gitdi. Orada tavattun edib ders-i âm [443] ve 1130’da ulemâdan Mahmûd Efendi’nin yerine Pervâne Bey Medresesi müderrisi oldu.
Tam kırk dört yıl orada tedrîs ve ta’lîm-i Kur’ân ile iştigâl ederek fevkalâde iştihâr edib 1171 senesi cumâdelâhiresinde azm-i dârü’l-karar etdi. Âlim, sâlih, mücevvid, şeyhü’l-kurrâ demekle meşhûr idi.
Mahdûmu Mehmed Emin Efendi de ulemâdan olup yerine müderris ve 1176 rebîülâhirinde merhûm oldu. Bunun mahdûmu Hâfız Halîl Efendi de kurrâdan olup 1226’da vefât etdi. Sahîb-i tercemenin birâderzâdesi Ca’fer Efendi bin Abdullah Ağa Kayseriyye’de âlî bir medrese yaptırdı.