Amasya züamâsından Mehmed Bey’in oğludur. Bu da sipâhi olup Girid muhârebâtında ibrâz-ı şecâatle kendisini Köprülü Mehmed Paşa’ya beğendirdiğinden yanına alıb ağalarından oldu. 1059 recebinde müşârün-ileyh tarafından Amasya mütesellimi olup 1060 şâbânında ma’zûl oldu.
Ba’dehû müşârün-ileyhin kethüdâsı olup zaman-ı azlinde Amasya’ya geldi. 1065’de beraber İstanbul’a gidip 1066 zilka’desinde müşârün-ileyhin sadrâzam olması üzerine kapıcılar kethüdâsı ve 1067’de Çanakkale harbinde mîr-livâ oldu. 1069’da vefât etdi. Mahdûmu Ahmed Paşa ve kerîmesi Ümmihânî Hânım olup dâmâdı Bekir Beyzâde Ömer Paşa’dır.
Amasya a’yânından Taşcızâde el-Hâc Halîl Ağa bin el-Hâc Mehmed Ağa 1071’de vefât etdi. Zevcesi sâhibü’l-hâl es-Seyyid Ahmed Kebîr evlâdından Şerîfe Afitâb Hâtun olup bundan mahdûmu Emîr Ağa demekle meşhûr es-Seyyid Mehmed Ağa’dır.
Diğer eski Kethüdâ Mahallesi a’yânından Halîl Ağa bin [417] Ali Ağa 1073 ve Sâdât-ı Hüseyniyye’den es-Seyyid Halîl Çelebi de 1065’de nakîbü’l-eşrâf kâ’im-makâmı olup ba’de’l-azl 1074 hudûdunda vefât etdi. Bu da a’yân-ı sâdâtdan idi.