Köprülü Mehmed oğludur. İstanbul’da tahsîl-i ulûm [421] ve ahz-ı vücûh edib Timurkapı Mescid-i şerîf imâmı oldu. Savt-ı edâsı güzel, halûk bir zât olduğundan evâil-i sadâretinde Köprülü Mehmed Paşa’ya imâm olup irtihâline kadar vazîfesine devam etdi.
1072 senesi rebîülevvelinde müşârün-ileyhin irtihâli ve mahdûmu Fâzıl Ahmed Paşa’nın sadâreti üzerine paşa-yı müşârün-ileyhe de imâm olup yıllarca bu vazîfesini hüsn-i ifâ eylediğinden 1086 senesi evâilinde Lâdikli Hâfız Ali Efendi’nin imâmetden afvına binâen yerine imâm-ı sânî-i şehriyârî oldu.
Ancak iki yıl kadar padişaha imâmet edib 1088 senesi rebîülâhirinde dâr-ı bekâya irtihâl etdi. Âlim, sâlih, halûk bir zât idi. Mahdûmu mevâlîden İsmail Efendi ve birâderi de sâbıkü’t-terceme İsmail Efendi’dir. Şeyhülislâm İsmail Asım Efendi bunun hafîdidir.