[438]Amasya müftüsü fâzıl-ı meşhûr Merzifonî el-Hâc Mustafa Efendi’nin mahdûmudur. Pederinden ve Koca Müftü el-Hâc İsmail, Mütevellîzâde el-Hâc Ahmed Efendilerden iktisâb-ı fezâ’il edib ders-i âm ve müderris-i be-nâm oldu.
1137’de Sultânîye-i Merzifon müderrisi olarak oraya gitdi. 1139’da Anadolu Kazaskeri olan Merzifonî Dürrî Mehmed Efendi’nin himmetiyle silsile-i ulemâya dâhil olup tedrîcen altmışlı pâyesine kadar geldi. Sadr-ı müşârün-ileyhin zaman-ı meşîhatinde 1147 senesi şevvâlinde Amasya müftüsü olarak geldi.
1149 senesi saferinde Mar’aş mollası olup gitdi. 1150 senesi evâsıtında ma’zûlen gelip 1155 senesi muharreminde nakîbü’l-eşrâf kâ’im-makâmı ve 1156 senesi cumâdelûlâsında ma’zûl ve zilka’desinde sânîyen Amasya müftüsü oldu.
Üç yıl kadar Amasya fetvâsında kalıb tedrîs ve ifnâ ile iştigâl ve 1159 senesi ramazânın yirmi sekizinci günü dâr-ı bekâya irtihâl etdi. Gâyet fakîh ulûm-ı şer’iyyede kâmil, vakûr, vecîh bir zât idi. [439] Mahdûmları es-Seyyid Abdurrahman, Abdurrahim Efendiler de mevâlîdendir.