Amasya’nın Gümüşlüzâde Mahallesi eşrâfından el-Hâc Sâlih Ağa bin Mehmed Ağa’nın mahdûmu ve Yeğenzâde es-Seyyid Halîl Bey’in kerîmezâdesidir. 1258’de doğdu. Selâmzâde Mustafa Bey’in kerîmesiyle teehhül edib pederinin irtihâlinde teayyün ederek belediye âzası oldu.
1301’de Belediye reisi intihâb edilib 1305 ramazânında riyâsetde ibkâ ve rütbe-i sâlise ile taltîf edildi. 1306’da mutasarrıf Ca’fer Sâdık Paşa’nın hiddeti ve Ermenilerin harekâtı yüzünden azl edildiyse de 1307’de meclis-i idâre âzâsı oldu.
1313 senesi cumâdelûlâsında Mutasarrıf Çerkes Bekir Sıtkı Paşa’nın yardımıyla sânîyen Belediye Reisi olduğu halde 1314 senesi rebîülevvelinde Ermenilerin iğtişâsı hengâmesinde mutasarrıf-ı mûmâ-ileyhin hiddeti yüzünden azl edildi. Sene-i mezbûrenin recebinde mutasarrıf olarak gelen Mehmed Kemal Bey’in zamanında kûşe-i [472] inzivâya çekildi.
1317’de Sivaslı Hacı Hasan Paşa’nın himmetiyle rütbe-i sânîye alıb 1321 senesi recebinde Mutasarrıf Mehmed Kemal Bey’in azl ve nefyi üzerine şevvâlinde üçüncü defa olarak Belediye reisi oldu. 1323 senesi saferinde mutasarrıf olup gelen Kıbrıslı Ahmed Cevdet Bey’in vürûdu ve halkın şikâyâtı üzerine azl edilib dâr-ı bekâya rihlet etdi.
Mütedeyyin, halîm, mümtezic, ümmî bir hânedân idi Mahdûmları Mustafa, Ali Beylerdir. Dâmâdı, Şirvânî Zekeriya Efendizâde Mehmed Ragıb Efendi’dir. İki mahdûmu da eşrâf-ı memleketden ve âzâ-yı nâfiadan idiler. Birâderi Mehmed Münib Bey’dir. Bu iki birâderin evlâdı ve ahfâdı çokdur.