Amasyalıdır. Amasya a’yânından Hasan Bey bin el-Hâc Es’ad Ağa’nın mahdûmudur. Takriben 1268’de Amasya’nın Eski Kethüdâ Mahallesi’nde doğdu. Rüştiye mektebinin ilk küşâdında dâhil olup fünûn-ı lâzimeyi ba’de’t-tahsîl İstanbul’a giderek Mekteb-i hukuka girdi.
1294’de müddeî umûmî olup birkaç sancağa gitdi. Bâ’dehû ceza re’isi olup 1306’da Sivas vilâyeti istinâf müddeî umûmîsi olarak mütemâyiz rütbesini aldı. 1309’da Cezayir-i Bahr-i Sefid vilâyeti istinâf müddeî umûmîsi olup 1310’da ûlâ sânîsi rütbesini aldı.
1314’de Beyrût ve 1315 senesi muharreminde Trabzon vilâyetleri istînâf müddeî umûmîsi olup vilâyetlerin ahvâl-i [245] husûsîyesini Sultân Abdülhamîd-i Sânî’ye arz ve i’lâm ederek müşârün-ileyhin teveccühâtını kazandığından 1318’de Beyoğlu mahkemesi âzası olarak İstanbul’a gelip ûlâ evvelî rütbesini aldı.
1318 senesi şâbânında Üsküdar mutasarrıfı muavini ve şevvâlinde Üsküdar mutasarrıfı olup zilhiccesinde rütbe-i bâlâyı aldı. Sekiz yıl kadar Üsküdar’da hasâfet-kârâne ifâ-yı vazîfe-i sadâkat edib Sultân Abdülhamîd Hân’ın itimâdını kazandı. 1306 senesi cumâdelâhiresinde zabtiye nâzırı olacağı esnâda meşrûtiyet ilân edildiğinden bi’z-zarûre makâmdan çekildi.
1327 senesi rebîülevvelinin yirmi yedinci günü 31 Mart hadisesinden dolayı bir şübhe üzerine Üsküdar’daki konağından kaldırılıb İstanbul Divân-ı harbine getirilirken Şirket-i Hayriye vapurundan Kızkule civârında kendini denize atıb mağrûken vefât etdi.
Umûr-ı adliyede mâhir, muktedir, idâre-i mülke kâdir, cesûr, fatin, gâyet müşekkel, kesifü’l-lihye, yakışıklı, faâl, iş-güzâr, âl-i cenâb muktesıd bir zât idi. Kardeşleri Ahmed Nâfiz, Abdülkadir Kadri Beylerdir. [246] Diğer birâderi İbrâhim Cemal Bey’dir.