Amasyalıdır. Kibâr-ı ümerâdan Yahşi Bey bin İsa Bey’in mahdûmu ve sadr-ı esbak Bâyezîd Paşa’nın birâderidir. Çelebi Sultân Mehmed Hân’ın havâss-ı ümerâsından olup Siroz [248] Beyi iken 822 senesi cumâdelâhiresinde Melik Gâzi İsmail Bey’in vefâtı üzerine Amasya vâlîsi Şehzâde Sultân Murâd’ın lalası olarak Amasya’ya geldi.
824’de Sultân Murâd’ın taht-ı saltanata cülûsunda Edirne muhâfızı olup 826’da birâderi Bâyezîd Paşa’nın ma’iyyetinde “Düzme Mustafa” denilen Şehzâde Sultân Mustafa harbine gitdi. Birâderi esir ve şehîd olduğu esnâda firâr edib Edirne’ye geldi.
827’de Silistre Beyi olup Sultân Mustafa’nın ahvâlini tarassuda me’mûr oldu. 828’de Şehzâde-i müşârun-ileyhin üçüncü defa hurûc ve kıyâmında ma’iyyet-i mevcûdesiyle üzerine hücûm edib kardeşinin intikâmını aldı. Şehzâdenin maktûlen vefâtı üzerine 829’da Anadolu beylerbeyi olarak Ankara’da ikâmet etdi.
831’de ma’zûlen gelip az sonra Edirne’de vefât etdi. Meşâhîr-i ümerâdan bir zât idi. Mahdûmlarından Yahşi Bey meşhûr olup İstanbul fethinde şehîd oldu. Bunun evlâdından İskender Paşa bin Mustafa [249] Bey ve Ahmed Paşa ma’rûfdur. Diğer mahdûmu Ahmed Bey’dir.