Köprülüdür. Mandalar Ağası Arnavut Koca Hasan Ağazâde Sinan Ağa’nın mahdûmudur. Ceddi Hasan Ağa Köprü’de mukîm olup Köprülü Mehmed Paşa’nın pederi olan Hüseyin Ağa’nın birâderi zann olunur.

Evâil-i hâlinde sipâhî olup sonra Köprülü Mehmed Paşa’nın dâiresine intisâb etdi. 1064’de paşanın kethüdâsı görüldü. 1065’de Köprü’de Paşa’nın vekil-i umûru olup 1067’de İstanbul’a geldi. Enderûn ağalarına iltihâk ederek Paşa’nın enderûnda gözü ve kulağı mesâbesinde kaldı.

Ba’dehû Sultân Mehmed Hân-ı Râbi’in validesi Hatice Turhan Sultân’ın kethüdâsı olarak enderûnda temâyüz etdi. 1088’de Rûmeli Beylerbeyliği pâyesiyle tekrîm edilib 1094 senesi recebinde valide Sultân’ın vefâtı üzerine Ordu-yı Hümâyûn’a [268] gönderildi.

1095 senesi muharreminde rütbe-i vezâretle Mısır vâlîsi olup gitdi. 1099 senesi cumâdelûlâsında Şam vâlîsi olarak Mısır’dan çıkarıldı. 1101 senesi evâsıtında Şâmîlerin şikâyetleri üzerine Trablusşâm’a nakl edilib oraya vusûlünde ansızın vefât etdi. Edîb, kâmil, nedîm, bir zât ise de irâde-i mülkiyyede râcil idi. Mahdûmu Nu’mân Bey 1129’da vefât etdi. Birâderleri Hasan, Mehmed Efendilerdir.