Varaylıdır. Hüseyin bin İbrâhim oğludur. Amasya’da tahsîl-i ulûm edib ders-i âm olduğu esnâda Amasya’nın [458] eski kazâ merkezi olan Varay kasabasında Ece Sultân tekkesi ve imâreti şeyhliği inhilâl etdiğinden 1099’da mezkûr tekke şeyhi ve vakfı mütevellîsi oldu.
Aralıkta “evlâd-ı vâkıftanım” diyerek tevliyete müdâhale eden sipâhî meşâhîrinden Osmân Ağa’nın müdâhalesini def’ ederek otuz sekiz yıl kadar mütevellî, şeyh ve kazâ müftüsü olduğu hâlde 1139 senesi şevvâlinde vefât etdi. Ulemâdan zî-nüfûz bir şeyh idi.
Mahdûmları Hâfız Hüseyin, İbrâhim Efendilerdir. Hâfız Hüseyin Efendi pederinin mevki’ini işgâl etdiyse de sene-i mezbûre zilhiccesinde vefât edib oğulları İsmâ’îl, Osmân Efendiler tevliyete mutasarrıf oldu. İsmâ’îl Efendi 1149’da ve Osmân Efendi 1178’de vefât etdi.
Bunları ta’kîben eş-Şeyh Ömer Efendi bin İbrâhim Efendi bin eş-Şeyh Müftü Hasan Efendi mütevellî ve şeyhi olup 1191’de vefâtıyla oğulları es-Seyyid Mehmed, Ahmed, Halîl, Alî Efendilere müştereken tevliyet-i mezkûre tevcîh edildi.
Es-Seyyid Mehmed Efendi 1221’de vefât edib mahdûmu Mehmed Sa’îd [459] Efendi ve birâderi Halîl Efendi’de 1221’de vefât edib büyük mahdûmu Osmân Efendi hisselerine mutasarrıf oldu. Bunun diğer mahdûmundan hafîdi Şeyhülislâm Amasyalı Kara Halîl Efendi bin Mustafa bin Halîl Efendi’dir.
Es-Seyyid Ahmed Efendi 1230’da vefât edib oğulları Ömer, Mustafa, Abdullah ve es-Seyyid Alî Efendi de 1250’de vefât edib oğulları İbrâhim Efendiler tevliyet ve meşîhat cihetlerine mutasarrıf olmuşlardır.