Amasya’nın Gümüşlüzâde Mahallesi eşrâfından ve Sipâhî a’yânından el-Hâc Mehmed Ağa bin kethüdâ-yı sadr-ı âlî Sâlih Ağa bin Ahmed Ağa bin Topçu Mehmed Ağa mahdûmudur. Sipâhî olup hidemât-ı harbiyye ve mîriyyede istihdâm edilerek Ammîzâde Mehmed Paşa’ya intisâb etdi.
Müşârün-ileyhin vezâretinde kethüdâsı olup hayli nüfûz u i’tibâr kazandı. 1128 senesi evâ’ilinde paşası i’dâm edildikte Amasya’ya gelip sonra Hicâz’a gitdi. Avdette hâciyân ve a’yân meclislerine a’zâ olduğu hâlde 1141 senesi [460] evâhirinde vefât etdi.
Amasya a’yânından hânedân bir kimse idi. Oğulları Mustafa, Mehmed, Sâlih Ağalar ma’rûftur. Mustafa Ağazâde yeniçeri serdârı Hâfız el-Hâc Abdurrahmân Ağa 1219’da vefât etdi. Bunun birâderzâdesi Mehmed Ağa’nın mahdûmu el-Hâc Sâlih Ağa’dır. Bunun mahdûmları Mehmed Münîb, Halîl Beyler Amasya eşrâfından idiler. Bunların evlâdı çoktur.