Amasyalıdır. Çavuşân-ı dergâh-ı âlînin yedinci bölüğünde mukayyed Amasyalı Alî Ağa bin Hüsâm Ağa bin Alî Çelebi bin Müftü Yahyâ Efendi’nin mahdûmudur. Pederinin 1186 senesi recebinde irtihâli üzerine dergâh-ı âlî çavuşânından olup aynı bölüğe kayd edildi. 1198 târîhli Enderûn defteri’nde ağayân sırasına “Hüsâm Alî Amâsiyye” diye künyesi yazılı görüldü.
Cülûsundan mukaddem Sultân Selîm Han-ı Sâlis’in hizmetine girip kendisini sevdirdiğinden 1203’de taht-ı Osmânîye cülûs edince kahvecibaşı olup silahdâr-ı şehriyârî derecesinde bir nüfûz u i’tibâr kazandı. İkbâlini müteneffizân-ı asr çekemediğinden 1207 senesi muharreminin ikisinde vezâretle Bosna vâlîsi olup İstanbul’dan uzaklaşdırıldı.
Çünkü Sadr-ı a’zam Melek Mehmed Paşa bunun sadârete geleceğinden endişe ediyordu. Bunun için Bosna’da vücûduna lüzûm-ı kavî gösterilerek Sultân Selîm-i Sâlis iknâ edilmişti. Bosna’da zuhûr eden karışıklığı müdebbirâne [340] hareket ederek bastırdı.
1209 senesi şevvâlinde Hotin vâlîsi olup Besarabya’ya gitdi. Orada Ruslar’la Rûmenler’in çevirdikleri entrikayı keşf ederek Eflak ve Boğdan voyvodalarını tazyîke başladı. Bundan dolayı 1211’de Selânik vâlîliğine nakl edildi. 1212 senesi cumâdelûlâsında dâr-ı bekâya irtihâl etdi.
Sâdık, müdebbir, afîf bir vezîr idi. Mahdûmu Mehmed Bey dergâh-ı âlî kapıcı-başılarından olup 1258’de vefât etdi. Bunun evlâdından İsmâ’îl Hakkı Bey, Hacı Velî Ağa’nın kerîmezâdesi olup 1273 senesi cumâdelâhiresinde vefât etdi. Haydar Paşa’da medfûndur. Kuşadalı İbrâhim Efendi Hazretleri’nden münîb idi. Hacı Velî Ağa da Amasyalıdır.