Amasyalıdır. Mehmed Çelebi mahdûmudur. Gençliğinde yeniçeri olup Sinan Paşa’nın yanında bir müddet hidemât-ı askeriyyede bulundu. Bunun vefâtında Amasya’ya gelip eşkıya muhârebâtında hayli nâm-dâr olarak Amasya serdârı oldu.
Eşkıyâ aleyhine serdâr olan Sadr-ı a’zam Kuyucu Murâd Paşa eşkıyâyı istîsâl husûsunda gösterdiği yararlıkları takdîr ederek 1017’de [43] ma’iyyetine alıb İstanbul’a getirdi. Ocak çorbacılarından oldu.
1033’de Amasyalı Gonçezâde Hızır Paşa’nın dâmâdı olan sadr-ı esbak Bosnalı Hüsrev Paşa’nın ağalığında sırasıyla zağarcı-başı, 1034’de kul kethüdâsı oldu ise de Paşa’nın hiddetini celb edecek harekâtda bulunduğundan 1035 senesi recebinde azl edildi.
Sene-i mezbûre şevvâlinde Paşa’nın hiddeti zâil olup azli icâb eden sekbân-başı Sarı Mehmed Ağa’nın yerine arz ve inhâsıyla sekbân-başı oldu. Paşa’nın sadâretden azlini müteâkib tekâüd edildi. 1044’de İstanbul müfettişi olup 1045 senesi evâhirinde vefât etdi. Yeniçeri ümerâsından şeci’ bir zât idi. Mahdûmu vüzerâdan Küçük Hasan Paşa’dır.