Amasya eşrâfından Veli Bey’in mahdûmudur. Altmış dördüncü bölükde mukayyed sipâhi olup hayli muhârebâta [44] iştirâk ederek ma’rûfiyet kazandı. Bir müddet Gümüş Madeni emîni oldu. 1031 senesi evâilinde Lâdikli Kurd Ağazâde Bayram Paşa’nın birâderi Mahmûd Bey Yörgüç Paşa vakfına mütevellî olmuşdu.
Hilâf-ı şart-ı vâkıf olan Mahmûd Bey’in tevliyetine itirâz ederek sene-i mezbûre şevvâlinde mîr-i mûmâileyhin ref’inden ceddi vakfına mütevellî olarak Amasya’ya geldi. 1032’de Abaza Mehmed Paşa’nın aleyhine hareket eden erbâb-ı hamiyyete iltihâk eylediğinden ba’zı mesâib görüb tevliyetden azl edildi.
1037’de Hüsrev Paşa’nın sadâretinde mîr-livâ olup İran harbine beraber gitdi. Erzurum ve Irak vekâyiinde bulundu ve 1041’de ma’zûlen Amasya’ya gelip sonra sânîyen Yörgüç Paşa vakfına mütevellî olduğu halde 1048 senesi zilka’desinde vefât etdi. Yıllarca harb ü vegâda imrâr-ı hayat etmiş, şeci’, kerîm, hânedân bir gâzi idi.