Amasyalıdır. Muallim-i Sultânî Mevlâna Sofu Bâyezîd Çelebizâde Mevlânâ Muhyiddîn Mehmed Çelebi mahdûmudur. Fuzalâdan tahsîl-i ulûm ederek Amasya’da ders-i âm oldu. Sultân Bâyezîd-i Sânî Amasya’ya vâlî olarak geldikde müşârün-ileyhe intisâb [11] edib sofuzâdelikle iştihâr etdi.
Ba’dehû Atabeg Gâzi, Yörgüç Paşa Medreselerine sırasıyla müderris ve 868’de Tokat kâdısı görüldü. Ba’dehû Sultân Bâyezîd’in ma’iyyet ordusu kâdısı olup Amasya’ya geldi. 877’de Gürcistan seferine ordu kâdısı olduğu halde gidip 881 senesi hudûdunda vefât etdi. Kibâr-ı ulemâ ve a’yân-ı kudâtdan idi.
Diğer Sofuzâde Hüseyin Çelebi bin Mahmûd Çelebi bin Sofu Bâyezîd Çelebi de a’yândan olup bu esnâlarda vefât etdi. Birinci Hüseyin Çelebi’nin mahdûmu Bâyezîd Efendidir. Meşâhîr-i ulemâdan Hüseyin Çelebi bin Abdullah Rumî de 891 sâline doğru vefât etdi. Hızır Paşa müderrisi bir fâzıl idi.