Amasyalıdır. El-Hâc Osmân Ağa bin Çorumlu Arabacı Ali Ağa’nın mahdûmudur. Yukarıda tercemesi yazılan amcasından ve Amasya müftüsü Çorumlu es-Seyyid el-Hâc Ali Efendi’den ve üstâz-ı meşhûr Laz İbrâhim Efendi’den ikmâl-ı tahsîl ederek ders-i âm-ı meşhûr oldu.
Hayli müddet Sultân Bâyezîd Câmii vâizi ve ser ü haddi el-Hâc Mustafa Efendi’ye müsevvid ve emînü’l-fetvâsı olup 1192 senesi recebinde Fâzıl Hüseyin Efendi’nin irtihâli üzerine Amasya müftüsü oldu. Üç yıl kadar makâm-ı fetvâda kaldı.
1195 senesi cumâdelâhiresinin yirmi sekizinde fetvâdan hacr edilib Caniklizâde Mikdat Ahmed Paşa’nın Amasya’ya mutasarrıf olarak geldiğini müteâkib sene-i mezbûrenin gurre-i ramazânında sânîyen Amasya müftüsü oldu. [134] Bu defasında iki buçuk yıl kadar makâm-ı fetvâda kalıb 1198 senesi muharreminde vefât etdi. Âlim, fakîh, vâiz, hüsn-i takrîr ve beyâna mâlik, vakûr, sâlih, afîf, mutedil bir zât idi. Mahdûmu el-Hâc Osmân Efendi’dir.